ಈ ಪ್ರೀತಿ... ಬೆಳಕೇ..

ಕಣ್ಣನು ಮುಚ್ಚಿ ಕನಸನು ಹಚ್ಚೀ

ನಗುವ ಮನಸ್ಸೇ ನೀ ಹೇಳು
ಇದು ಕನಸೇ ನನಸೇ ಒಮ್ಮೆ ನನ್ನ ಕೇಳು
ಆಸೆಯ ಹಕ್ಕಿ ಬಾನಿಗೆ ನೀನೇ ಚುಕ್ಕಿ
ಹಾರುತ ಸಾಗುತ ನೀ ಹೇಳು
ಇದು ಕನಸೇ ನನಸೇ ಒಮ್ಮೆ ನನ್ನ ಕೇಳು
ಇದು ಹೇಗೆ..ಇದು ಯಾಕೆ..ನಾನಂತು ತಿಳಿಯೇ
ನನ್ನೆದೆಯಾ ಧರೆಯಾ ಬೆಳಗೋ ಈ ಪ್ರೀತಿ... ಬೆಳಕೇ..ನಾನಂತು ಅರಿಯೇ..

ಒಲವಿನ ಪಾಠ ಕಲಿಸುವ ನೋಟ
ನನ್ನಲಿ ಕೇಳಿದೆ ನಿನ್ನನ್ನು
ಅನುಕ್ಷಣದ ಪ್ರೀತಿ..ಅನುರಾಗದ ರೀತಿ
ವಿವರಣೆ ಕೇಳಿದೆ ನಿನ್ನಲ್ಲಿ
ಗೆಳೆಯಾ ನೀನು ನನಗೆ ಜೀವ
ನನ್ನ ಮನದ ಕವಿತೆಗೆ ನೀನೇ ಭಾವ..
ಇದು ಹೇಗೆ..ಇದು ಯಾಕೆ..ನಾನಂತು ತಿಳಿಯೇ
ನನ್ನೆದೆಯಾ ಧರೆಯಾ ಬೆಳಗೋ ಈ ಪ್ರೀತಿ... ಬೆಳಕೇ..ನಾನಂತು ಅರಿಯೇ..

ನಿನ್ನ ನೆನಪಿನ ಉಸ್ಸವ ನಗುವಾಗಿ ನನ್ನ ಕಾಡಿದೆ
ಒಡನಾಟದ ಕಲರವ ಹಸಿರಾಗಿ ನನ್ನ ಸೇರಿದೆ
ಕಥೆಯಾಗುವ ಕಥೆಯಲ್ಲಿ..ನಾ ಎದೆ ತುಂಬಿ ಹಾಡಿದೆ
ಗೆಳೆಯಾ ನಿನ್ನ ಪ್ರೀತಿಗೆ ನಾ ಸೆರೆಯಾದೆ ನನ್ನೊಳಗೆ..
ಇದು ಹೇಗೆ..ಇದು ಯಾಕೆ..ನಾನಂತು ತಿಳಿಯೇ
ನನ್ನೆದೆಯಾ ಧರೆಯಾ ಬೆಳಗೋ ಈ ಪ್ರೀತಿ... ಬೆಳಕೇ..ನಾನಂತು ಅರಿಯೇ..

ಕಣ್ಣನು ಮುಚ್ಚಿ ಕನಸನು ಹಚ್ಚೀ
ನಗುವ ಮನಸ್ಸೇ ನೀ ಹೇಳು
ಇದು ಕನಸೇ ನನಸೇ ಒಮ್ಮೆ ನನ್ನ ಕೇಳು
ಆಸೆಯ ಹಕ್ಕಿ ಬಾನಿಗೆ ನೀನೇ ಚುಕ್ಕಿ
ಹಾರುತ ಸಾಗುತ ನೀ ಹೇಳು
ಇದು ಕನಸೇ ನನಸೇ ಒಮ್ಮೆ ನನ್ನ ಕೇಳು
ಇದು ಹೇಗೆ..ಇದು ಯಾಕೆ..ನಾನಂತು ತಿಳಿಯೇ
ನನ್ನೆದೆಯಾ ಧರೆಯಾ ಬೆಳಗೋ ಈ ಪ್ರೀತಿ... ಬೆಳಕೇ..ನಾನಂತು ಅರಿಯೇ..

ನಿಮ್ಮವ,
ರಾಘು.

ಮನೆ ಮಗು

ಪ್ರತಿ ಮನೆಯಲಿ ಒಂದು ಮಗುವಿರಬೇಕು
ಅದರ ತುಟಿಯಲಿ ಸ್ವಲ್ಪ ನಗುವಿರಬೇಕು
ದಿನವಿಡೀ ಸಣ್ಣ ಮುದ್ದು ಹಟವ ಮಾಡುತಲಿರಬೇಕು
ಕೇಳಿದ ಕೂಡಲೇ ಸಿಹಿ ಮುತ್ತು, ಕಹಿ ಮುತ್ತು
ಎನ್ನುತ ಮುತ್ತನು ಕೊಡುತಿರಬೇಕು

ಪ್ರತಿ ಮನೆಯಲಿ ಒಂದು ಮಗುವಿರಬೇಕು
ಅದರ ತುಟಿಯಲಿ ಸ್ವಲ್ಪ ನಗುವಿರಬೇಕು..

ಯಜಮಾನನ ಹಾಗೆ ತಾ ಹೇಳುವ ಕೆಲಸವ
ಮನೆಮಂದಿ ಆಳಿನ ಹಾಗೆ ಮಾಡುತಲಿರಬೇಕು
ಸುಮ್ಮನೆ ಎಲ್ಲರೂ ಕೆಲಸವ ಮಾಡುತಲಿರಬೇಕು
ಖುಷಿಯಲಿ ಕಂದ ನೀಡುವ ಮುತ್ತಿಗೆ
ಮನೆಮಂದಿ ಎಲ್ಲರೂ ಕಾಯುತಲಿರಬೇಕು,
ಸುಮ್ಮನೆ ಎಲ್ಲರೂ ಕಾಯುತಲಿರಬೇಕು.

ಪ್ರತಿ ಮನೆಯಲಿ ಒಂದು ಮಗುವಿರಬೇಕು
ಅದರ ತುಟಿಯಲಿ ಸ್ವಲ್ಪ ನಗುವಿರಬೇಕು..

ಅಪ್ಪನ ಕೋಪ, ಅಮ್ಮನ ದಣಿವು
ಎಲ್ಲವ ನಗುವಲಿ ಮರೆಸುತಲಿರಬೇಕು
ಕಂದ ನೀ, ಎಲ್ಲರ ನೋವ
ನಗುವಲಿ ಮರೆಸುತಲಿರಬೇಕು
ನೀ ಹಗಲಿಗೆ ಸೂರ್ಯ, ಇರುಳಿಗೆ ಚಂದ್ರನಂತೆ
ಮನೆಯ ನೀ ಬೆಳಗುತಲಿರಬೇಕು

ಪ್ರತಿ ಮನೆಯಲಿ ಒಂದು ಮಗುವಿರಬೇಕು
ಅದರ ತುಟಿಯಲಿ ಸ್ವಲ್ಪ ನಗುವಿರಬೇಕು..

ನಿಮ್ಮವ,
ರಾಘು.

ಏನಾಗಿದೆ.. ಈ ಮನಸಿಗೆ..

ಏನಾಗಿದೆ..ಈ ಹಾಡಿಗೆ, ಏನಾಗಿದೆ..ಈ ಮನಸಿಗೆ,
ಏನಾಗಿದೆ..ಈ ಜೀವಕೆ, ಏನಾಗಿದೆ..ಈ ಭಾವಕೆ,
ಮರೆಯದ ನೆನಪಿಗೆ..ಸೋತಿದೆ ಜೀವ,
ಅರಳದ ಕನಸಿಗೆ..ನೊಂದಿದೆ ಭಾವ.

ಏನಾಗಿದೆ..ಈ ಹಾಡಿಗೆ, ಏನಾಗಿದೆ..ಈ ಮನಸಿಗೆ,
ಏನಾಗಿದೆ..ಈ ಜೀವಕೆ, ಏನಾಗಿದೆ..ಈ ಭಾವಕೆ.

ಕಣ್ಣ ತುಂಬೆಲ್ಲವೂ ನಿನ್ನ ನೆನಪೇಕಿದೆ,
ಎದೆಯ ಒಳಗೆಲ್ಲವೂ ನಿನ್ನ ನಗು ಕೂತಿದೆ,
ಉಸಿರ ಕಣಕಣದಲ್ಲಿಯೂ ನಿನ್ನ ಹೂ ಬೆಳಕಿದೆ,
ಯಾಕೆ ಹೀಗೆ, ಇಂದು ಈ ಮನಸೇ ಹಾಗೇ..

ಏನಾಗಿದೆ..ಈ ಹಾಡಿಗೆ, ಏನಾಗಿದೆ..ಈ ಮನಸಿಗೆ,
ಏನಾಗಿದೆ..ಈ ಜೀವಕೆ, ಏನಾಗಿದೆ..ಈ ಭಾವಕೆ.

ಮಾತಿಗೆ ನಿನ್ನ ಜೊತೆಯೇ ಇಲ್ಲ, ಮೌನಕೆ ಜಗವೇ ಎಲ್ಲಾ,
ಕಳೆಯಲು ದಿನಗಳೇ ಇಲ್ಲ, ಆಸೆಗೆ ಜಾಗವೇ ಇಲ್ಲ,
ಯಾಕೆ ಹೀಗೆ, ಇಂದು ಈ ನೆನಪೇ ಹಾಗೇ..
ಹಗಲು..ಇಳಿಯುತ್ತಿದೆಯೋ,
ನೋವು..ನಗುವಾಗಿದೆಯೋ,
ಉಳಿಸೇ ಈ ಜೀವ, ಮರೆಸೇ ಈ ನೋವ..

ಏನಾಗಿದೆ..ಈ ಹಾಡಿಗೆ, ಏನಾಗಿದೆ..ಈ ಮನಸಿಗೆ,
ಏನಾಗಿದೆ..ಈ ಜೀವಕೆ, ಏನಾಗಿದೆ..ಈ ಭಾವಕೆ,
ಮರೆಯದ ನೆನಪಿಗೆ..ಸೋತಿದೆ ಜೀವ
ಅರಳದ ಕನಸಿಗೆ..ನೊಂದಿದೆ ಭಾವ.

ನಿಮ್ಮವ,
ರಾಘು.

ನನಗೆ.. ನೀನೇ ಉಸಿರು..

ಮನದ ಭುವಿಗೆ ಬಿತ್ತು ಪ್ರೀತಿ ಮಂಜು
ಮುತ್ತಿನ ಮಂಜು ನನ್ನೆದೆ ಸೇರಿತು,
ನನ್ನೊಳಗೆ ನನಗೆ ಆಸರೆ ಆಯಿತು,
ಇದು ನನ್ನ ಕನಸೋ, ಅಲ್ಲ,
ಇದು ಯಾರ ನನಸೋ, ಅರಿಯೆ ನಾನು..

ನೆನದ ಹೃದಯ ಮೌನ ಬಿಟ್ಟು ಮಾತಾಡಿದೆ..
ನನಗೆ ನೀನೇ ಉಸಿರು, ನನಗೆ ನೀನೇ ಹಸಿರು
ನನಗೆ ನೀನೇ ಬೆಳಕು, ನನಗೆ ನೀನೇ..ಬದುಕು..

ಅಂದು ಗಿಡವಾಗಿದ್ದ ಕನಸು
ಇಂದು ನನ್ನೇ ಕಾಯುವ ಹೆಮ್ಮರವಾಗಿದೆ,
ದಣಿದ ಮನಕೆ ಒಲವ ನೆರಳಾಗಿದೆ,
ಕೈ ಚಾಚಿ ತನ್ನೆಡೆಗೆ ಬಾ ಎಂದಿದೆ,
ನೆನಪು ಕಡಲು, ನಗುವು ಹೊನಲು,
ಇದು ನನ್ನ ಕನಸೋ, ಅಲ್ಲ,
ಇದು ಯಾರ ನನಸೋ, ಅರಿಯೆ ನಾನು

ನೆನದ ಹೃದಯ ಮೌನ ಬಿಟ್ಟು ಮಾತಾಡಿದೆ..
ನನಗೆ ನೀನೆ ಉಸಿರು, ನನಗೆ ನೀನೆ ಹಸಿರು
ನನಗೆ ನೀನೆ ಬೆಳಕು, ನನಗೆ ನೀನೆ.. ಬದುಕು..

ಬಾನ ಕಣ್ಣ ತುಂಬಾ ನೆನಪ
ಕರಿಮೋಡ.. ಹರಿದಾಡಿದೆ..
ಕರಗಿ ಧರೆಗೆ ಬರುವ ಸುಳಿವು
ಮೊದಲ ಹನಿ ನೀಡಿದೆ..
ಸಮಯ ನನ್ನ ಕಾಯುತ್ತಿಲ್ಲ..ಮನಸು ನನ್ನ ಕೇಳುತ್ತಿಲ್ಲ..
ಇದು ನನ್ನ ಕನಸೋ, ಅಲ್ಲ,
ಇದು ಯಾರ ನನಸೋ, ಅರಿಯೆ ನಾನು

ನೆನದ ಹೃದಯ ಮೌನ ಬಿಟ್ಟು ಮಾತಾಡಿದೆ..
ನನಗೆ ನೀನೇ ಉಸಿರು, ನನಗೆ ನೀನೇ ಹಸಿರು
ನನಗೆ ನೀನೇ ಬೆಳಕು, ನನಗೆ ನೀನೇ..ಬದುಕು..

ನಿಮ್ಮವ,
ರಾಘು.

ನಾಡಿದು.. ಕರುನಾಡಿದು..

ನಾಡಿದು.. ಕರುನಾಡಿದು..
ನಲ್ಮೆಯ.. ಒಲುಮೆಯ.. ಹೆಮ್ಮೆಯ.. ಬೀಡಿದು.. ಕರುನಾಡಿದು..
ಪ್ರೀತಿಗೆ.. ವಿಶ್ವಾಸಕೆ.. ಶಾಂತಿಗೆ.. ತವರೂರಿದು..
ನಾಡಿದು.. ಕರುನಾಡಿದು..
ನಲ್ಮೆಯ.. ಒಲುಮೆಯ.. ಹೆಮ್ಮೆಯ.. ಬೀಡಿದು.. ಕರುನಾಡಿದು.. ||

ಸಹ್ಯಾದ್ರಿಯ ಸೊಬಗಿದೆ..
ದುಮ್ಮುಕ್ಕಿ ಹರಿಯುವ ಕಾವೇರಿ ನದಿಯಿದೆ..
ಬೇಲೂರಿದೆ, ಹಳೇಬೀಡಿದೆ..
ಚಾಮುಂಡಿ ತಾಯಿಯ ಗುಡಿಯಿದೆ..
ನಾಡಿದು.. ಕರುನಾಡಿದು..
ನಲ್ಮೆಯ.. ಒಲುಮೆಯ.. ಹೆಮ್ಮೆಯ.. ಬೀಡಿದು.. ಕರುನಾಡಿದು.. ||

ಸೋಲಲಿ ಗೆಲುವಿನ ನಗೆ ಬೀರುವ ಹೃದಯವಂತರು..
ಜ್ಞಾನದ ಬೆಳಕನು ಎಲ್ಲಡೆ ಹಂಚುವ..
ಪ್ರತಿಫಲ ಬಯಸದೆ ಹಸ್ತವ ಚಾಚುವ
ಗುಣವಂತರು.. ಈ ನಾಡಿನ ಹಿರಿಮೆಯ ಗರಿಗಳು..
ನಾಡಿದು.. ಕರುನಾಡಿದು..
ನಲ್ಮೆಯ.. ಒಲುಮೆಯ..ಹೆಮ್ಮೆಯ.. ಬೀಡಿದು.. ಕರುನಾಡಿದು.. ||

ಬೆಳೆಯುವ ಸಿರಿಗೆ ನಿದರ್ಶನ ಇಲ್ಲಿನ ಮಕ್ಕಳು..
ನಾಳೆಯ ಭರವಸೆಯ ಕಣ್ಗಳು..
ಹತ್ತಾರು ಪ್ರಾಂತ್ಯದ ವಿವಿಧ ಕನ್ನಡ
ನಿತ್ಯಸತ್ಯದ ಸಂತೋಷದ ಅಲೆಗಳು..
ನಾಡಿದು.. ಕರುನಾಡಿದು..
ನಲ್ಮೆಯ.. ಒಲುಮೆಯ..ಹೆಮ್ಮೆಯ.. ಬೀಡಿದು..ಕರುನಾಡಿದು.. ||

ನಿಮ್ಮವ,
ರಾಘು.

ನಗುವಿನ ಹೂಮಳೆ

ಅದೇನು ಅಂತ ಹೇಳಲಿ, ಅದ್ಯಾವ ರಾಗದಲ್ಲಿ ಹಾಡಲಿ
ಎದೆಯಲಿ ಒಡಲಲಿ ಪ್ರೀತಿ ಕಚಗುಳಿ
ಕನಸಲಿ ಮನಸಲಿ ನೀನು ನನ್ನಲಿ...

ಅದೆಂಥ ಮೋಡಿ ನಿನ್ನದು, ಮನಸು ನಿನ್ನ ಬಿಟ್ಟು ಕೂರದು
ಬಳಿಯಲಿ ನಗುವಲಿ ಒಲವ ಸುಳಿಯಲಿ
ಮಾತಲಿ ನೆನಪಲಿ ನೀನು ನನ್ನಲಿ

ಸೋನೆ ಮಳೆಯಲಿ ನೀನು ಜೊತೆಯಲಿ
ಬಯಸಿ ಬಂದ ಹೂಮಳೆ ಬಾನಿನಂಚಲಿ
ಮೆಲ್ಲ ಮುದ್ದು ನಸುನಗೆ ತುಟಿಯಂಚಲಿ

ಅದೇನು ಅಂತ ಹೇಳಲಿ, ಅದ್ಯಾವ ರಾಗದಲ್ಲಿ ಹಾಡಲಿ
ಎದೆಯಲಿ ಒಡಲಲಿ ಪ್ರೀತಿ ಕಚಗುಳಿ
ಕನಸಲಿ ಮನಸಲಿ ನೀನು ನನ್ನಲಿ...

ಅದೆಷ್ಟು ಬಾರಿ ಕೇಳಲಿ, ಅದ್ಯಾವ ಗುಡಿಯಲಿ ಬೇಡಲಿ
ಅಕ್ಕರೆ, ಮಮತೆಗೆ ಅವಳೇ ದೇವತೆ
ಬೆಳಗುವ ಬೆಳಕಿಗೇಕೆ ಬೇಕು ಹೋಲಿಕೆ

ಅದೆಲ್ಲಿ ಅಂತ ಹುಡುಕಲಿ, ಮತ್ತೆ ಮತ್ತೆ ನಿನ್ನಲಿ
ಖುಷಿಯಲಿ, ಸುಖದಲಿ, ಅನುರಾಗದಲೆಯಲಿ
ಸೋಲಲಿ ಗೆಲುವಲಿ ನೀನು ನನ್ನಲಿ

ಅದೇನು ಅಂತ ಹೇಳಲಿ, ಅದ್ಯಾವ ರಾಗದಲ್ಲಿ ಹಾಡಲಿ
ಎದೆಯಲಿ ಒಡಲಲಿ ಪ್ರೀತಿ ಕಚಗುಳಿ
ಕನಸಲಿ ಮನಸಲಿ ನೀನು ನನ್ನಲಿ...


ನಿಮ್ಮವ,
ರಾಘು.

ಬದುಕು... ಚಲಿಸುವ ಬಂಡಿ...

ನಿನ್ನೆಯ ನೋವನು ಇಂದು ಮರೆಯುವ
ನಾಳೆಯ ಕನಸನು ಮತ್ತೆ ಕಾಣುವ
ಸೋಲಿಗೆ ಹೆದರಿ ಮುದುಡಿ ಕೂರದೆ
ನೆನ್ನೆಯ ನೆನಪನು ನೆನೆಯುತ ಸಮಯ ಕಳೆಯದೆ
ಕಾಲವ ಹಿಂದಿಕ್ಕಿ ಮುಂದೆ ಸಾಗುವ ಮನಸು ಮಾಡುವ
ಏನೇ ಅಗಲಿ, ಬಂದದ್ದೆಲ್ಲಾ ಬರಲಿ
ನಿನ್ನೆಯ ನೋವನು ಇಂದು ಮರೆಯುವ
ನಾಳೆಯ ಕನಸನು ಮತ್ತೆ ಕಾಣುವ...

ಬದುಕು ನಮ್ಮದು ನೋವು ನಲಿವಿನ
ಹಳಿಯಲಿ ಚಲಿಸುವ ಬಂಡಿಯು
ಹಿಂದೆ ತಿರುಗಿ ಚಲಿಸುವುದುಂಟೇ
ಚಲಿಸುವ ಬಂಡಿಯು ಚಲಿಸುತಲಿರುವುದು
ಅವರಿವರು ಬರುವರೆಂದು ಕಾಯುವುದುಂಟೇ
ಏನೇ ಅಗಲಿ, ಬಂದದ್ದೆಲ್ಲಾ ಬರಲಿ
ನಿನ್ನೆಯ ನೋವನು ಇಂದು ಮರೆಯುವ
ನಾಳೆಯ ಕನಸನು ಮತ್ತೆ ಕಾಣುವ...

ಗಾಳಿಪಟವು ಹಕ್ಕಿಯ ನೋಡಿ
ಗಗನದ ತುಂಬಾ ನಾ ಹಾರುವೆ ಎಂದರೂ
ಗಾಳಿಯು ಇಲ್ಲದೆ ಬಾನಲಿ ತೇಲುವುದುಂಟೇ
ಭರವಸೆ ಇಲ್ಲದ ಬಾಳು ನಗುತ ಸಾಗುವುದುಂಟೇ
ಏನೇ ಅಗಲಿ, ಬಂದದ್ದೆಲ್ಲಾ ಬರಲಿ
ನಿನ್ನೆಯ ನೋವನು ಇಂದು ಮರೆಯುವ
ನಾಳೆಯ ಕನಸನು ಮತ್ತೆ ಕಾಣುವ...

ನಿಮ್ಮವ,
ರಾಘು.

ಹೀಗೇಕೆ... ಅನಿಸುತಿದೆ...

ಮಾತಿನ ಮಾತಿನಲಿ ಪ್ರೀತಿಯ ನೆನಪಿನಲಿ
ಕನಸಿನ ಬಯಲಲಿ ನೀ ನನ್ನ ಸನಿಹದಲಿ ಬಂದು ಹೇಳುತಿರುವೆ
ಒಂದೆರಡು ಮಾತು ಆಡು ನೀನೆಂದು
ನೂರೆಂಟು ಕನಸು ಕಾಣುವೆ ನಾನೆಂದುಹೇಳುತ ನಾಚುತ
ಮರೆಯಾದೆ ಪುಷ್ಪರಾಶಿಯ ನಡುವಲ್ಲಿಯೇ ಹೋದವಳ
ಹುಡುಕುತ ನಾ ಬಂದೆ, ಎಷ್ಟು ಹುಡುಕಿದರೂ ಇರಲಿಲ್ಲ ನೀ ಅಲ್ಲಿ
ಏಕೆ ಹೀಗೆ ಅಂದುಕೊಳ್ಳುವಸ್ಟರಲ್ಲಿ
ಬೆನ್ನಹಿಂದೇನೆ ನಸುನಗುತ ನಿಂತಿರುವೆ ಹೊವೊಂದು ಮುಡಿದು ನಸುನಗುತ ನಿಂತಿರುವೆ...

ಮಾತಿನ ಮಾತಿನಲಿ ಪ್ರೀತಿಯ ನೆನಪಿನಲಿ
ಕನಸಿನ ಬಯಲಲಿ ನೀ ನನ್ನ ಸನಿಹದಲಿ ಬಂದು ಹೇಳುತಿರುವೆ
ಒಂದೆರಡು ಮಾತು ಆಡು ನೀನೆಂದು
ನೂರೆಂಟು ಕನಸು ಕಾಣುವೆ ನಾನೆಂದು...

ಮನಸಿನ ಮನಸಲಿ ನೀ ನಿಂತು ಕೊಂಡಿರುವೆ
ಹೇಳಬೇಕು ಅಂದುಕೊಂಡಿರುವ ಎಲ್ಲಾ ವಿಷಯವನು ನೀ ತಿಳಿದುಕೊಂಡಿರುವೆ
ಬೀಳುವ ಕನಸನು ಲೆಕ್ಕ ಹಾಕಿ ನೀ ನೋಡಿದಮೇಲೆಂತೋ
ಕಿರುನಗೆಯ ಬೀರಿ ಕಣ್ಮುಂದೇನೆ ಚಲಿಸಿರುವೆ
ಅದ ಕಂಡಮೇಲೆಂತೋ ನನ್ನ ಕಣ್ಣು
ಈ ಹುಡುಗಿ ಚುಕ್ಕಿ ತಾರೆಗಳ ಮಡಿಲಲ್ಲಿಯು ಹೊಳೆಯುವಳು ಎಂದ್ ಹೇಳುತ
ಅವಳ ಹಿಂದೆ ಹಿಂದೇನೆ ಹೊರಟಿತ್ತು ಪಯಣವ ಬೆಳೆಸಿತ್ತು...

ಮಾತಿನ ಮಾತಿನಲಿ ಪ್ರೀತಿಯ ನೆನಪಿನಲಿ
ಕನಸಿನ ಬಯಲಲಿ ನೀ ನನ್ನ ಸನಿಹದಲಿ ಬಂದು ಹೇಳುತಿರುವೆ
ಒಂದೆರಡು ಮಾತು ಆಡು ನೀನೆಂದು
ನೂರೆಂಟು ಕನಸು ಕಾಣುವೆ ನಾನೆಂದು...

ಎದೆಯ ಎದೆಯಲಿ ನೀನೆ ತುಂಬಿಕೊಂಡಿರುವೆ
ಬಾಳ ಪುಟಗಳಲಿ ನಿನ್ನ ಹೆಸರು ಬರೆದುಕೊಂಡಿರುವೆ ಎಂದೆಹೇಳಬೇಕೆನ್ನುವಸ್ಟರಲಿ
ಕನಸೊಂದು ಕಣ್ಣ ಮುಂದೇನೆ ನನಸಾಗುವ ರೀತಿಯ ಕಂಡು ಬೆರಗಾಗಿ ಹೋದವ ನಾನು
ನಿನ್ನ ಮಿಡಿಯುವ ಪ್ರೀತಿಯ ಮಿಡಿತಕೆ ಮರುಳಾಗಿ ಹೋದೆ ನಾನು...

ಮಾತಿನ ಮಾತಿನಲಿ ಪ್ರೀತಿಯ ನೆನಪಿನಲಿ
ಕನಸಿನ ಬಯಲಲಿ ನೀ ನನ್ನ ಸನಿಹದಲಿ ಬಂದು ಹೇಳುತಿರುವೆ
ಒಂದೆರಡು ಮಾತು ಆಡು ನೀನೆಂದು
ನೂರೆಂಟು ಕನಸು ಕಾಣುವೆ ನಾನೆಂದು...

ನಿಮ್ಮವ,
ರಾಘು.

ಸ್ನೇಹ - ಒಂದು ಆತ್ಮ ಎರಡು ಮನಸ್ಸು

ಸ್ನೇಹ ಬೆತ್ತಲೆ
ಹೋಗಲಾಡಿಸುವುದು ಮನದ ಕತ್ತಲೆ
ಸ್ನೇಹ ಆಗಸದೆತ್ತರಕೆ ಏರಲು ನೆರವಾಗುವ ಮೋಡದ ಕೈ
ಜಾರಿ ಬಿದ್ದರೆ ಕಾಪಾಡುವ ಭೂತಾಯಿಯ ಅಂಗೈ

ಕಂಡ ಕನಸಿಗೆ ಸ್ನೇಹ ಕನ್ನಡಿ
ನೊಂದ ಮನಸಿಗೆ ಸ್ನೇಹ ಸಾಂತ್ವನದ ಮುನ್ನುಡಿ
ತಪ್ಪು ದಾರಿಗೆ ಸ್ನೇಹ ಸನ್ಮಾರ್ಗದ ದಾರಿದೀಪ
ಸಂತಸದ ಸಂಭ್ರಮಕೆ ಸ್ನೇಹ ಸಪ್ತಸಾಗರ

ಒಂದೇ ಆತ್ಮದ ಎರಡು ಮನಸ್ಸು ಸ್ನೇಹ
ಎರಡು ಮನಸ್ಸಿನ ಒಂದೇ ಕನಸು ಸ್ನೇಹ
ಬೇಕಂದಾಗ ಸಹಾಯ ಮಾಡುವ ಸ್ನೇಹ ಹಸ್ತ
ದಣಿವಾದಾಗ ನೆರಳು ನೀಡುವ ಸ್ನೇಹ ವ್ರಕ್ಷ

ಸ್ನೇಹ ಬೆತ್ತಲೆ
ಹೋಗಲಾಡಿಸುವುದು ಮನದ ಕತ್ತಲೆ...

ನಿಮ್ಮವ,
ರಾಘು.

ನನ್ನಲಿ ನೀನು

ಇರು ನೀನು ಇರು ನೀನು ನನ್ನಲಿ ನನ್ನಯ ಮನದಲಿ ಇಂದು ಮುಂದು ಎಂದೆಂದು
ಬಾ ನೀನು ನನ್ನಯ ಕನಸಿನಲಿ ಪ್ರತಿ ದಿನವೂ ಎಂದೆಂದೂ
ನೋವಿರಲಿ ನಲಿವಿರಲಿ ಇರು ನೀನು ಇರು ನೀನು ಸದಾ ನನ್ನಲ್ಲಿ ನೀನು
ಪ್ರೀತಿಯ ತಾ ನೀನು ಎದೆಯಲಿ ಬೆಳಗು ನೀನು
ಪ್ರಾಣಕೆ ಸೂರಾಗಿ ಇರು ನೀನು

ಇರು ನೀನು ಇರು ನೀನು ನನ್ನಲಿ ನನ್ನಯ ಮನದಲಿ ಇಂದು ಮುಂದು ಎಂದೆಂದು
ಬಾ ನೀನು ನನ್ನಯ ಕನಸಿನಲಿ ಪ್ರತಿ ದಿನವೂ ಎಂದೆಂದೂ
ಇರು ನೀನು ಇರು ನೀನು ಸದಾ ನನ್ನಲಿ ನೀನು

ಬಾವಕೆ ರೆಕ್ಕೆಯಾಗಿ ಇರು ನೀನು, ಸ್ನೇಹಕೆ ಹಸ್ತವಾಗಿ ಇರು ನೀನು
ಗುಡಿಯಲಿ ದೇವತೆಯಾಗಿ ಇರು ನೀನು
ಇರು ನೀನು ಇರು ನೀನು ಸದಾ ನನ್ನಲಿ ನೀನು
ಬಾಳಿಗೆ ದಾರಿಯಾಗಿ ಇರು ನೀನು, ದಾರಿಗೆ ಹೂವಾಗಿ ಇರು ನೀನು
ಹೂವಿಗೆ ದುಂಬಿಯಾಗಿ ಇರು ನೀನು
ಇರು ನೀನು ಇರು ನೀನು ಸದಾ ನನ್ನಲಿ ನೀನು

ಸಂಗೀತಕೆ ಸ್ವರವಾಗಿ ಇರು ನೀನು, ಮಾತಿಗೆ ಅರ್ಥವಾಗಿ ಇರು ನೀನು
ಕಾಡಲಿ ಜಿಂಕೆಯಾಗಿ ಇರು ನೀನು, ನಾಡಲಿ ಹರಿಯುವ ನದಿಯಾಗಿ ಇರು ನೀನು
ಇರು ನೀನು ಇರು ನೀನು ಸದಾ ನನ್ನಲಿ ನೀನು
ನಸುಕಿಗೆ ವಸಂತವಾಗಿ ಇರು ನೀನು, ಇರುಳಿಗೆ ಶಕ್ತಿಯಾಗಿ ಇರು ನೀನು
ಶಕ್ತಿಗೆ ಪ್ರೇರಣೆಯಾಗಿ ಇರು ನೀನು
ಇರು ನೀನು ಇರು ನೀನು ಸದಾ ನನ್ನಲಿ ನೀನು

ಇರು ನೀನು ಇರು ನೀನು ನನ್ನಲಿ ನನ್ನಯ ಮನದಲಿ ಇಂದು ಮುಂದು ಎಂದೆಂದು
ಬಾ ನೀನು ನನ್ನಯ ಕನಸಿನಲಿ ಪ್ರತಿ ದಿನವೂ ಎಂದೆಂದೂ
ಇರು ನೀನು ಇರು ನೀನು ಸದಾ ನನ್ನಲಿ ನೀನು

ನಿಮ್ಮವ,
ರಾಘು.

ಮಾತಿನ ಅಲೆ

ನಿನ್ನ ಭೇಟಿ ಮಾಡಲು ಸಿಗುವುದು ನೆಪಗಳು ನೂರಾರು
ನಿನ್ನ ಜೊತೆ ಮಾತನಾಡಲು ಸಿಗುವುದು ಪದಗಳು ಸಾವಿರಾರು
ನೀನಿರುವೆ ಹತ್ತಾರು ಮೈಲುಗಳ ಆಚೇ
ಆದರೂ ನನ್ನದೇಗೆ ತಿಳಿಯುವುದು ನೀನಾಡುವ ಪ್ರತಿಯೊಂದು ಮಾತು

ನಿನ್ನ ಭೇಟಿ ಮಾಡಲು ಸಿಗುವುದು ನೆಪಗಳು ನೂರಾರು
ನಿನ್ನ ಜೊತೆ ಮಾತನಾಡಲು ಸಿಗುವುದು ಪದಗಳು ಸಾವಿರಾರು

ಅಲೆ ಅಲೆಯಾಗಿ ಬಂದ ಪ್ರೀತಿಯ ಮಾತು
ಕರೆದೊಯ್ಯುವುದು ಕ್ಷಣದಲ್ಲಿ ನೀನಿರುವ ಊರಿನೆಡೆಗೆ
ಜೊತೆ ಜೊತೆಯಾಗಿ ಬಂದ ನಗು ಆರಳುವುದು
ಕ್ಷಣದಲ್ಲಿ ಎನ್ನಯ ಮೊಗದಲ್ಲಿ
ಒಂದೂಂದಾಗಿ ನೆನಪಾಗುವ ನೀನಾಡುವ ಮಾತುಗಳು
ಪದೇ ಪದೇ ನಾ ಹೇಳುತಿರುವೆ ನಾನಾಡುವ ಸಾವಿರ ಪದಗಳಲ್ಲಿ

ನಿನ್ನ ಭೇಟಿ ಮಾಡಲು ಸಿಗುವುದು ನೆಪಗಳು ನೂರಾರು
ನಿನ್ನ ಜೊತೆ ಮಾತನಾಡಲು ಸಿಗುವುದು ಪದಗಳು ಸಾವಿರಾರು

ನನ್ನಯ ಕನಸುಗಳು ಆರಿತಿರುವ ವಿಷಯಗಳು ನಿನ್ನಯ ಮನದಲ್ಲಿ
ಹೆಜ್ಜೆಯ ಅಚ್ಚು ಹಾಕಿ ಅಲ್ಲೇ ಮನೆಯ ಮಾಡಿದೆ
ಎಸ್ಟೋ ದಿನಗಳ ನಂತರ ಸನಿಹದಿಂದ ಕೇಳಿದ ನಿನ್ನಯ
ಮಧುರ ಮಾತಿನ ಕನಸು ಹೆಚ್ಚಿಸಿದೆನ್ನೆಯ ಮುಖದ ಕಾಂತಿಯ
ಕನಸಿನ ಮಹೋತ್ಸವದಲ್ಲಿ ಮಾತಿನ ಕಲರವವು ಮೆಲ್ಲನೆ ಗುನುಗುತಿದೆ ಕಿವಿಯೊಳಗೆ...

ನಿನ್ನ ಭೇಟಿ ಮಾಡಲು ಸಿಗುವುದು ನೆಪಗಳು ನೂರಾರು
ನಿನ್ನ ಜೊತೆ ಮಾತನಾಡಲು ಸಿಗುವುದು ಪದಗಳು ಸಾವಿರಾರು

ನಿಮ್ಮವ,
ರಾಘು.

ನೋಟಿನ ಮಹಿಮೆ

ನೋಟು ನೋಟು ನೋಟು ಎಲ್ಲರಿಗು ಬೇಕು ನೋಟು
ಒದ್ದೆಯಾಗಿರಲಿ, ಅದು ಮುದ್ದೆಯಾಗಿರಲಿ ಇರಬೇಕು ಎಲ್ಲರ ಜೇಬಲ್ಲಿ ನೋಟು
ಕಂತೆ ಕಂತೆ ನೋಟುಗಳ ಸಂತೆ ನಾವಾಗಿದ್ದಲ್ಲಿ ಕೂಗಿ ಕರೆದು ಹಾಕುವರು ನಮಗೆ ಮಣೆ
ಇಲ್ಲದಿದ್ದರೆ ಕೊಡಲಾರರು ನಮಗೆ ಬೆಲೆ, ಜೊತೆಗೆ ನೆಲೆ
ನೋಟು ನೋಟು ನೋಟು ಎಲ್ಲರಿಗು ಬೇಕು ನೋಟು
ಒದ್ದೆಯಾಗಿರಲಿ, ಅದು ಮುದ್ದೆಯಾಗಿರಲಿ ಇರಬೇಕು ಎಲ್ಲರ ಜೇಬಲ್ಲಿ ನೋಟು...

ಗಾಂಧಿ ತಾತನನ್ನೇ ಮರೆತಿರುವ ಜನ ಮರೆಯರು
ಪ್ರತಿ ನೋಟಿನಲ್ಲಿ ತಾತನ ಹುಡುಕಲು
ಏಕೆಂದರೆ ಎಲ್ಲರಿಗೂ ತಿಳಿದಿರುವುದು ನೋಟಿನ ಅಂಕೆ ಸಂಖ್ಯೆ ಏನೇ ಆಗಿರಲಿ
ತಾತನಿಲ್ಲದ ನೋಟಿಗೆ ಜೀವವಿಲ್ಲ ಎಂದು
ನೋಟು ನೋಟು ನೋಟು ಎಲ್ಲರಿಗು ಬೇಕು ನೋಟು
ಒದ್ದೆಯಾಗಿರಲಿ, ಅದು ಮುದ್ದೆಯಾಗಿರಲಿ ಇರಬೇಕು ಎಲ್ಲರ ಜೇಬಲ್ಲಿ ನೋಟು...

ಪ್ರತಿ ಕೆಲಸದ ಹಿಂದೆ ನೋಟಿರಬೇಕು
ಅದು ಆಗಬೇಕಾದರೆ ಎಷ್ಟು ನೋಟಿರಬೇಕೋ ಅಸ್ಟಿರಬೇಕು.
ನೋಟಿನ ಮುಂದೆ ಯಾರು ಲೆಕ್ಕವೇ ಅಲ್ಲ
ಅದರ ಹಿಂದೆ ಯಾರು ಇಲ್ಲದವರಿಲ್ಲ
ನೋಟು ಇದ್ದರೆ ಆಸೆಗೆ ಮಿತಿಯೇ ಇಲ್ಲ, ಕನಸಿಗೆ ಕೊನೆಯೇ ಇಲ್ಲ,
ಜೀವಕೆ ಬೆಲೆಯೇ ಇಲ್ಲ, ಎನ್ನುವರು ಎಲ್ಲಾ
ನೋಟು ನೋಟು ನೋಟು ಎಲ್ಲರಿಗು ಬೇಕು ನೋಟು
ಒದ್ದೆಯಾಗಿರಲಿ, ಅದು ಮುದ್ದೆಯಾಗಿರಲಿ ಇರಬೇಕು ಎಲ್ಲರ ಜೇಬಲ್ಲಿ ನೋಟು...

ನಿಮ್ಮವ,
ರಾಘು.

ಏಕಾಂಗಿ

ಯಾರಿಗೆ ಯಾರೂ ಇಲ್ಲ ನನಗೆ ನಾನೇ ಎಲ್ಲಾ
ಕಂಬನಿ ಒರೆಸುವ ಕೈಗಳಿಲ್ಲ
ನೊಂದ ಭಾವಕೆ ಸಾಂತ್ವನ ಹೇಳುವವರಿಲ್ಲ
ಮನ ತುಂಬಿ ನಗುವ ಮನ ನನ್ನಲ್ಲಿ ಇಂದಿಲ್ಲ
ನಗಿಸುವ ಗುಣ ಯಾರಲ್ಲೂ ಇಲ್ಲ
ಯಾರಿಗೆ ಯಾರೂ ಇಲ್ಲ ನನಗೆ ನಾನೇ ಎಲ್ಲಾ...

ಇರುಳಲಿ ಚಂದ್ರನ ಸುಳಿವಿಲ್ಲ
ಹಗಲೆಂಬ ಬದುಕಿನಲಿ ರವಿಯ ಬೆಳಕಿಲ್ಲ
ಕೂತಲ್ಲಿಂದ ಕದಲುವ ಮನಸ್ಸಿಲ್ಲ
ಕನಸುಗಳು ಮರಿ ಹಾಕುವ ಲಕ್ಷಣವಿಲ್ಲ
ಯಾರಿಗೆ ಯಾರೂ ಇಲ್ಲ ನನಗೆ ನಾನೇ ಎಲ್ಲಾ...

ನೆನಪುಗಳನ್ನು ಇಂದು ಕಾಯುವವರಿಲ್ಲ
ಅವುಗಳದ್ದೇ ಕಾರುಬಾರು ಮನದೂರಲೆಲ್ಲಾ
ದೇವರಿಲ್ಲದ ಗುಡಿಯು, ನಿರ್ಜಿವ ಸೂರಿರುವ ಊರು
ಇಂದು ಈ ಏಕಾಂಗಿಯ ಊರಾಗಿದೆ
ಯಾರಿಗೆ ಯಾರೂ ಇಲ್ಲ ನನಗೆ ನಾನೇ ಎಲ್ಲಾ...

ನಿಮ್ಮವ,
ರಾಘು.
('ಒಬ್ಬಂಟಿ'ಯಿಂದ 'ಏಕಾಂಗಿ'ಯಾಗಿ 'ಒಬ್ಬಂಟಿ'ಗಾಗಿ ಬರೆದ ಒಂದು ಸಣ್ಣ ಕವಿತೆ.)

ನೀ ನೆಡೆದ ದಾರಿಯಲ್ಲಿ

ಮೋಡದ ಬಾಗಿಲು ನೀ ತೆರೆದು
ನಮ್ಮಡೆಗೆ ನೆಡೆದು ಬಂದು
ಎಲ್ಲರ ಮುಖದಲ್ಲಿ ನಗುವಿನ ಮಲ್ಲಿಗೆಯ ಪರಿಮಳವ ಪಸರಿಸಿ
ಮತ್ಯಾಕೆ ಮೋಡಗಳ ಕಡೆಗೆ ಮುಖವ ಮಾಡಿ
ಪಯಣದ ಸೂಚನೆ ನೀಡುತಿರುವೇ

ಅಲ್ಲಿರುವುದು ಕೇವಲ ನಿನ್ನಯ ಮಂಜಿನ ಮನೆ
ಇಲ್ಲಿರುವುದು ನಿನ್ನಯ ಬಂಧು ಮಿತ್ರರಿಂದ ಕೂಡಿದ ಮಮತೆಯ ಅರಮನೆ
ಮೋಡಗಳು ನಿನ್ನನ್ನು ಕೈ ಬೀಸಿ ಕರೆದಿರಲು
ತಿರುಗಿ ಹೋಗುವ ಮನಸ್ಸು ನೀ ಮಾಡಿರಲು
ಬೇಡ ಎನ್ನು ಮನ ಕೇಳಿತು ನೀನ್ಯಾರು ಎಂದು

ನೆನಪೆಂಬ ಹಾದಿಯಲ್ಲಿ ನೀ ಮರೆಯಾದಾಗ
ನಿನ್ನದೊಂದು ಜೀವವು ನಿನಗಾಗಿ
ಚಂದಿರನ ಕೇಳುತ, ವಿಷಯವ ತಿಳಿಸು ಎಂದು ಪಿಡಿಸುತ
ಕಣ್ಣಾ ಮುಚ್ಚಾಲೆ ಆಟವ ಆಡುತಿದೆ...

ನಿಮ್ಮವ,
ರಾಘು.

ಸುಂದರ ಚಂದಿರ

ಓ ಮುದ್ದಿನ ಮಗುವೇ, ಈ ಮನೆ ನಲ್ಮೆಯ ಹೂವೇ
ನೀ ಕರೆದರೆ ಬರುವೆ, ನಿನ್ನ ಹಿಂದಲೇ ಇರುವೆ, ನಿನ್ನ ಜೊತೆಯಲೇ ನಡೆಯುವೆ ನಾನು
ನೀ ನಕ್ಕರೆ ನಗುವೇ, ನೀ ಅತ್ತರೆ ಅಳುವೇನು ನಾನು

ಓ ಮುದ್ದಿನ ಮಗುವೇ, ಈ ಮನೆ ನಲ್ಮೆಯ ಹೂವೇ
ನೀ ಕರೆದರೆ ಬರುವೆ, ನಿನ್ನ ಹಿಂದಲೇ ಇರುವೆ, ನಿನ್ನ ಜೊತೆಯಲೇ ನಡೆಯುವೆ ನಾನು...

ನಿನ್ನಯ ತೊದಲು ನುಡಿಯು ಕೇಳಲು ಸುಂದರ
ನೀ ಹಾಕುವ ಹೆಜ್ಜೆಯು ನೋಡಲು ಬಲು ಹಿತಕರ
ನೀ ಮಾಡುವ ಹಠದಲಿ ಕಾಣುವೆ ನಾ ಸುಂದರ ಚಂದಿರ
ಓ ಮುದ್ದಿನ ಮಗುವೇ, ಈ ಮನೆ ನಲ್ಮೆಯ ಹೂವು ನೀನು

ಓ ಮುದ್ದಿನ ಮಗುವೇ, ಈ ಮನೆ ನಲ್ಮೆಯ ಹೂವೇ
ನೀ ಕರೆದರೆ ಬರುವೆ, ನಿನ್ನ ಹಿಂದಲೇ ಇರುವೆ, ನಿನ್ನ ಜೊತೆಯಲೇ ನಡೆಯುವೆ ನಾನು...

ಸನ್ನೆಯ ಮಾತು, ಗೆಜ್ಜೆಯ ಸದ್ದು ಸೇರಿದೆ ಮುಗಿಲ ಮಡಿಲು
ಹೆಜ್ಜೆಯ ಗುರುತು, ನೀ ನಿಡುವ ಮುತ್ತು ತಂದಿದೆ ಹರುಷದ ಕಡಲು
ಕೊಟ್ಟನು ದೇವ ಮನೆಗೆ ವರವ ನಿನ್ನಯ ರೂಪದಲಿ
ನಗುವಿನ ಜ್ಯೋತಿ ನೀನು ಬೆಳಗು ಮನೆಯಲಿ ಸದಾ

ಓ ಮುದ್ದಿನ ಮಗುವೇ, ಈ ಮನೆ ನಲ್ಮೆಯ ಹೂವೇ
ನೀ ಕರೆದರೆ ಬರುವೆ, ನಿನ್ನ ಹಿಂದಲೇ ಇರುವೆ, ನಿನ್ನ ಜೊತೆಯಲೇ ನಡೆಯುವೆ ನಾನು...

ಎಲ್ಲಾ ಅಮ್ಮಂದಿರಿಗೆ,

ನಿಮ್ಮವ,
ರಾಘು.

ಸಮಾನತೆಯ ಬೆಳಕು

ಕತ್ತಲೆಯ ಮಾಯೆಯ ಅಳಸಲು ಬಂದ ಜ್ಞಾನದ ಬೆಳಕು
ಅಜ್ಞಾನದ ಆಗರವ ತೊಳೆಯಲು ಬಂದ ಸುಜ್ಞಾನದ ಬೆಳಕು
ಮನಸ್ಸಿನ ಮನೆಯ ಮೂಲೆ ಮೂಲೆಯ ಆವರಿಸಲು ಬಂದ ನೆಮ್ಮದಿಯ ಬೆಳಕು
ಹೊಸ ನವೋಲ್ಲಾಸವನ್ನು ಹಣತೆ ದೀಪದಲಿ ಹರಡಲು ಬಂದ ಬೆಳಕು ಈ ದೀಪಾವಳಿಯ ಬೆಳಕು
ಕತ್ತಲೆಯ ಮಾಯೆಯ ಅಳಸಲು ಬಂದ ಜ್ಞಾನದ ಬೆಳಕು
ಅಜ್ಞಾನದ ಆಗರವ ತೊಳೆಯಲು ಬಂದ ಸುಜ್ಞಾನದ ಬೆಳಕು...

ಶತ ಶತಮಾನದಿಂದ ನೆಡದು ಬಂದ ಬೆಳಕು, ಹೊಸ ಹೊಸ ಕನಸ ಹಚ್ಚಿದ ಬೆಳಕು
ಬಾನ ಬಯಲ ಸೀಮೆಯಲ್ಲಿ ಕುಣಿಯುವ ಬಣ್ಣಗಳ ಬೆಳಕು
ನೀನ್ಯಾರು, ನಾನ್ಯಾರು ಎನ್ನುವ ಬೇಧ ಭಾವ ಮಾಡದೇ ಚೆಲ್ಲುವ ಸಮತೆಯ ಬೆಳಕು
ಶತ ಶತಮಾನದಿಂದ ನೆಡದು ಬಂದ ಬೆಳಕು, ಹೊಸ ಹೊಸ ಕನಸ ಹಚ್ಚಿದ ಬೆಳಕು ಈ ದೀಪಾವಳಿಯ ಬೆಳಕು...

ಮನೆಮಂದಿಯೆಲ್ಲಾ ಒಂದಡೆಗೆ ಸೇರಿದಾಗ ನಗುವ ಹಂಚಲು ಬರುವ ಬೆಳಕು
ಊರೆಲ್ಲಾ ಬೆಳಗಲು ಮುಂದಾಗುವ ಆಕಾಶದೀಪದ ಬೆಳಕು
ಕಹಿಯ ಸುಟ್ಟು, ಕಷ್ಟಗಳ ಕಳೆದು, ಮನವ ಬೆಳಗುವ ಬೆಳಕು ಈ ದೀಪಾವಳಿಯ ಬೆಳಕು
ಕತ್ತಲೆಯ ಮಾಯೆಯ ಅಳಸಲು ಬಂದ ಜ್ಞಾನದ ಬೆಳಕು
ಅಜ್ಞಾನದ ಆಗರವ ತೊಳೆಯಲು ಬಂದ ಸುಜ್ಞಾನದ ಬೆಳಕು ಈ ದೀಪಾವಳಿಯ ಬೆಳಕು...

ನಿಮ್ಮವ,
ರಾಘು.

ನಿನ್ನ ನಗು

ನಿನ್ನ ನಗುವಿಗಿ೦ತ ನಿನ್ನ ಕೋಪ ನಿನಗೆ ಚ೦ದ ಕಣೆ
ನಿನ್ನ ಮುದ್ದು ಮುಖಕ್ಕಿ೦ತ ನಿನ್ನ ನಿರ್ಮಲ ಮನಸ್ಸು ನಿನಗೆ ಸೊಬಗು ಕಣೆ
ಯಾವ ಹುಡುಗಿಯಲ್ಲೂ ಕಾಣದ ಸ್ವಲ್ಪ ಸಿಟ್ಟಿನ ಮನಸ್ಸಿನ ಮಿನಿಗುತಾರೆ ನೀನೆ ಕಣೆ
ನಿನ್ನ ನಗುವಿಗಿ೦ತ ನಿನ್ನ ಕೋಪ ನಿನಗೆ ಚ೦ದ ಕಣೆ
ನಿನ್ನ ಮುದ್ದು ಮುಖಕ್ಕಿ೦ತ ನಿನ್ನ ನಿರ್ಮಲ ಮನಸ್ಸು ನಿನಗೆ ಸೊಬಗು ಕಣೆ...

ನಿನ್ನ ರೂಪ ನೋಡಿ ನಾಚಿ ಮರೆಯಗುವನು ಚ೦ದ್ರ ಬಿಳಿ ಮೋಡದ ಒಳಗೆ
ನಿನ್ನ ಮಾತು ಕೇಳಲು ಬೇಡಿರುವನು ಮಳೆರಾಯ ಧರೆಯ ಆಸರೆಯನು
ಮಲ್ಲಿಗೆ ಹೂವುಗಳು ಹ೦ಬಲಿಸಿ ತುದಿಗಾಲಲಿ ನಿ೦ತಿರುವವು ನಿನ್ನ ಮುಡಿಗೆ ಒರಗಲು
ಯತ್ನಿಸಿರುವುದು ತ೦ಗಾಳಿ ಅಲೆ ಅಲೆಯಾಗಿ ತೇಲುತ್ತ ನಿನ್ನೆಡೆಗೆ ಬರಲು
ನಿನ್ನ ನಡಿಗೆಯ ನೋಡಿ ನಿ೦ತಲ್ಲಿಯೇ ಕನಸು ಕ೦ಡವು ಸಾಲು ಮರಗಳು ಸಾಲು ಸಾಲಾಗಿ
ನಿನ್ನ ನಗುವಿಗಿ೦ತ ನಿನ್ನ ಕೋಪ ನಿನಗೆ ಚ೦ದ ಕಣೆ
ನಿನ್ನ ಮುದ್ದು ಮುಖಕ್ಕಿ೦ತ ನಿನ್ನ ನಿರ್ಮಲ ಮನಸ್ಸು ನಿನಗೆ ಸೊಬಗು ಕಣೆ....

ನೀ ಅತ್ತರೆ ನಿನ್ನ ನಗಿಸಲು ಬರುವವು ತಾರೆಗಳು ಮೋಡಗಳ ತೂರಿ
ನೀ ನಕ್ಕರೆ ನಿನ್ನ ನಗುವಿನ ಚ೦ದ ನೋಡಲು ಬರುವವು ಮಳೆಯು ಹನಿ ಹನಿಯಾಗಿ
ಮಿ೦ಚಿ ಮರೆಯಾಗುವ ನಿನ್ನ ಕೋಪ
ಉಕ್ಕಿ ಹರಿದು ಕಡಲು ಸೇರುವ ನಿನ್ನ ನಗು ನನಗೆ ಬಲು ಇಷ್ಟ ಕಣೆ....

ನಿಮ್ಮವ,
ರಾಘು.

ಮನದ ತುಡಿತ

ಎದೆಯ ಒಡಲಿಗೆ ಇ೦ದು ಏನೋ ಆಗಿದೆ
ಮನದ ತುಡಿತ ಕಣ್ಣ ತುದಿ ಸೇರಿದೆ
ಒಲವಿನ ಮಳೆಯು ಮನದೂರನ್ನು ತೊಯ್ದುಕೊ೦ಡು ಹೋಗಿದೆ
ಮಾತಿಗಿ೦ತ ಮೌನವೇ ಇ೦ದು ಎಲ್ಲೆ ಮೀರಿದೆ
ಎದೆಯ ಒಡಲಿಗೆ ಇ೦ದು ಏನೋ ಆಗಿದೆ
ಮನದ ತುಡಿತ ಕಣ್ಣ ತುದಿ ಸೇರಿದೆ...

ಕೇಳದೇ ಬಿದ್ದಿರುವ ಕನಸಿನ ಒಳನೋಟವ ಹುಡುಕುವ ಪ್ರಯತ್ನ ಮನದಲ್ಲಿ ಸಾಗಿದೆ
ತಿಳಿಸದೇ ಬ೦ದಿರುವ ಪ್ರೀತಿಯ ಸಾಕುವ ಕೆಲಸ ಎದೆಯಲ್ಲಿ ನಡೆದಿದೆ
ಕಣ್ಣೀರನ್ನು ಹಿಡಿಯುವ ಭಾಗ್ಯ ಕೈಗಳಿಗೆ ದೊರೆತಿದೆ
ವರ್ಣಮಯ ಜಗತ್ತಿಗಿ೦ತ ಮೌನಮಯ ಜಗತ್ತು ನನಗೆ ಕೊ೦ಚ ಇಷ್ಟವಾಗಿದೆ...

ಕಣ್ಣಿಗೆ ಕಾಣಿಸದ ನೋವು ಎದೆಯಲ್ಲಿ ಅಡಗಿ ಕುಳಿತಿದೆ
ತಳಮಳದ ಉಸಿರಿಗೆ ಮೌನವೂ ಇ೦ದು ಜೀವ ತು೦ಬಿದೆ
ಪುಟ್ಟ ಪುಟ್ಟ ಕನಸುಗಳು ದಣಿವಿಲ್ಲದೆ ಬೆಟ್ಟದ ಹಾಗೆ ಬೆಳೆದು ನಿ೦ತು
ಇದು ಯುಗ ಯುಗದ ನ೦ಟು ಎ೦ದು ತಿಳಿ ಹೇಳಿದೆ
ಎದೆಯ ಒಡಲಿಗೆ ಇ೦ದು ಏನೋ ಆಗಿದೆ
ಮನದ ತುಡಿತ ಕಣ್ಣ ತುದಿ ಸೇರಿದೆ...

ನಿಮ್ಮವ,
ರಾಘು.

ಪಯಣ ದೀಪದೆಡೆಗೆ

ವರುಷಗಳು ಕೂಗಿದವು ಹರುಷವ ತರುವೆವೆ೦ದು
ಕಾಣಿಸದ ಕಣ್ಣಿಗೆ ದೀಪವ ನೀಡುವೆವೆ೦ದು
ಕಾದಿರುವೆ ನಾ ಹುಟ್ಟಿನಿ೦ದ ನನ್ನೀ ಕತ್ತಲೆಯ ಅವಸಾನಕ್ಕೆ
ಬದುಕಿರುವೆ ನಾ ನನ್ನೀ ಕಾಣದ ಮುಖವ ಕಾಣುವ ಬಯಕೆಯಿ೦ದ
ವರುಷಗಳು ಕೂಗಿದವು ಹರುಷವ ತರುವೆವೆ೦ದು
ಕಾಣಿಸದ ಕಣ್ಣಿಗೆ ದೀಪವ ನೀಡುವೆವೆ೦ದು...

ಹುಟ್ಟಿದೆ ನಾ ಮಾಡದ ತಪ್ಪಿಗೆ ಅ೦ಧಃನಾಗಿ
ರೋಸಿ ಹೋಗದೆ ಹೋರಾಡುತಿರುವೆ ನಾ ಕತ್ತಲಯೋಗಿಯಾಗಿ
ಕಾಣದಾದೆ ಪ್ರೇಮದ ನೆರಳನ್ನ ನನ್ನೀ ಅ೦ಧಃಕಾರದ ಜಗದಲ್ಲಿ
ಬಣ್ಣಿಸದೇ ಅಳಿಯೆನು ಈ ಬಣ್ಣದ ಲೋಕದ ಬಣ್ಣವನ್ನು
ವರುಷಗಳು ಕೂಗಿದವು ಹರುಷವ ತರುವೆವೆ೦ದು
ಕಾಣಿಸದ ಕಣ್ಣಿಗೆ ದೀಪವ ನೀಡುವೆವೆ೦ದು...

ಕೊಲ್ಲುತಿಹುದು ಕತ್ತಲೆಯು ದಿನವಿಡೀ ನನ್ನನು
ಆದರೂ ಛಲ ಬಿಡದೆ ನಡೆಯುತಿರುವೆ ನಾ ವರುಷಗಳು ತಿಳಿಸಿರುವ ದಿಕ್ಕಿನೆಡೆಗೆ
ಮಾಸಿರುವ ಕಣ್ಣುಗಳಲ್ಲಿ ರವಿಯ ಬೆಳಕು ಹೊರಹೊಮ್ಮುವುದೆನ್ನುವ ಬಯಕೆಯಿ೦ದ
ಸಾಗುತಿದೆ ಪಯಣ ನಿರ೦ತರ ದೀಪದೆಡೆಗೆ ...

ಅ೦ತ್ಯದಿ೦ದಲೇ ಹೊಸತನದ ಆರ೦ಭ ಎನ್ನುವುದನ್ನು ನ೦ಬುತ
ನನ್ನೀ ಪದಗಳನ್ನು ಬೆಳಕನ್ನು ಕ೦ಡಿರದ ಬದುಕಿಗೆ ಅರ್ಪಿಸುತ್ತಿದ್ದೇನೆ.

ನಿಮ್ಮವ,
ರಾಘು.

ಆಸೆಯ ಮಹಲ್

ಹೃದಯಕ್ಕೆ ತಲುಪಿತಿಂದು ಮೌನದ ಮಾತೊಂದು
ಕಟ್ಟಿತು ನನ್ನಲ್ಲಿ ಕನಸಿನ ಮಹಲೊಂದು
ಸೋತಿತು ಜೀವವು ಆಸೆಯ ಚೆಲ್ಲಾಟಕೆ
ಅರಿವಾಯಿತು ನನಗಿಂದು ನನ್ನಲ್ಲಿಯೂ ಪ್ರೀತಿ ಇದೆಯೆಂದು
ಹೃದಯಕ್ಕೆ ತಲುಪಿತಿಂದು ಮೌನದ ಮಾತೊಂದು
ಕಟ್ಟಿತು ನನ್ನಲ್ಲಿ ಕನಸಿನ ಮಹಲೊಂದು....

ಬರಿದಾದ ಹೃದಯದಲ್ಲಿ ಒಲವಿನ ದೀಪ ಹಚ್ಚಿದಳು, ಕನಸಿನ ಬೀಜ ಬಿತ್ತಿದಳು
ಹಕ್ಕಿಯಂತೆ ಹಾರಡಿದೆ ನಾ ಮನದ ಮಹಲಿನಲ್ಲಿ
ಖುಷಿಯಿಂದ ತೇಲಾಡಿದೆನು ನಾ ಅಮಲಿನ ತುತ್ತಿನಲ್ಲಿ
ಮೈಮರೆತು ಬೆರಗಾಗಿ ನಿಂತೆ ನಾ ಆ ಪದಗಳಿಲ್ಲದ ಕರೆಯೋಲೆಗೆ...

ಕಳೆದೆನು ಸಮಯ ಬರೀ ಕನಸು ಕಟ್ಟುವಲ್ಲಿ
ಅರಿಯೆದಾದೆನು ಮನದೊಡತಿಯ ಮನದಾಳದ ಮೌನದ ಮಾತುಗಳನ್ನ
ಕಳೆದೆನು ಸಮಯ ಬರೀ ಕನಸು ಕಟ್ಟುವಲ್ಲಿ
ಅರಿಯೆದಾದೆನು ಮನದೊಡತಿಯ ಮನದಾಳದ ಮೌನದ ಮಾತುಗಳನ್ನ
ನನ್ನಂತರಾಳದ ಬಾವನೆಗಳು ನನ್ನ ಜೀವದ ಗೆಳತಿಗೆ ಬೇಡವಾಗಿ
ಉಳಿದಳಿದವು ನನ್ನಲ್ಲಿಯೇ ಮೌನವಾಗಿ...

ಕನಸಿನ ಮಹಲ್ ಕಟ್ಟುವ ಜೀವಗಳಿಗೆ ಸಮರ್ಪಿತ

ನಿಮ್ಮವ,
ರಾಘು.